पेरिस । आइतवार दक्षिण फ्रान्समा आएको आँधीको चेतावनीका कारण स्थगित भएको खेलमा मार्सेले पिएसजीलाई पराजित गरेको छ। खेल सुरु भएको पाँच मिनेटमै मार्सेले अग्रता लिएको थियो र त्यसलाई अन्तिमसम्म जोगाउन सफल भयो।

क्रसमा आएको बललाई मोरोक्कोका डिफेन्डर नायेफ अगुएर्दले हेडमार्फत खाली पोष्टमा पठाउँदै निर्णायक गोल गरे। पिएसजीका गोलकिपर लुकास चेभालिएर बल समाउन बाहिर निस्कँदा चुकेपछि मार्सेले अवसरलाई गोलमा परिणत गरेको हो।

खेलभर पिएसजीले बढी कब्जा राखे पनि बलियो डिफेन्स तोड्न नसक्दा गोल गर्न असफल रह्यो। दोस्रो हाफमा पनि लगातार आक्रमण गरे तापनि गोलका अवसर खेर गए।

यस जितसँगै मार्सेले घरेलु लिगमा उत्कृष्ट सुरुवात कायम राख्दै लगातार ३ खेलमा जित हात पार्‍यो। ५ खेलबाट ९ अंक जोड्दै टोली छैटौँ स्थानमा पुगेको छ। योसँगै मार्सेले पिएसजीविरुद्ध घरेलु मैदानमा अन्तिम ६ भेटमा पहिलो पटक गोल गरेको हो।

पिएसजी भने संयुक्त दोस्रो स्थानमा झरेको छ। मोनाको गोल अन्तरका आधारमा शीर्षमा रहँदा दुवै टोलीको समान १२ अंक छ। लियोन र स्ट्रासबुर्गले पनि समान अंक जोडेका छन्।

यसबीच, सोमवार पेरिसमा सम्पन्न ‘ब्यालोन डि’ओर’ समारोहमा धेरै पिएसजी खेलाडी सहभागी हुन सकेनन्। पुरुषतर्फ नामाङ्कित ९ खेलाडीमध्ये पिएसजीका उस्मान डेम्बेलेले पुरस्कार जितेका छन्।