काँग्रेस उपसभापति धनराज गुरुङले सहकारी प्रकरणमा संलग्नता अस्वीकार गर्दै निष्पक्ष छानबिनको माग
प्रकाशित मिति : कार्तिक ०७ २०८१,बुधबार
नेपाली काँग्रेसका उपसभापति धनराज गुरुङले सहकारी प्रकरणमा आफ्नो कुनै संलग्नता नरहेको बताएका छन्। उनले यो विषयमा निष्पक्ष छानबिन हुनुपर्ने भन्दै सम्मानित संसदमा आफूले कुरा राखिसकेको बताए। गुरुङले आफू सधैं भ्रष्टाचार र भ्रष्टाचारीको विरुद्ध खरो उत्रने सच्चा नेपाली भएको दाबी गरेका छन्।
गुरुङले भने, ‘सहकारी ठगी प्रकरणमा मेरो कुनै सहभागिता छैन र निष्पक्ष छानबिनका लागि संसदमा म स्पष्ट रूपमा बोलिसकेको छु। म सधैं भ्रष्टाचार र भ्रष्टाचारीको विरुद्ध खरो उत्रने सच्चा नेपाली हुँ।’
साथै, उनले रास्वपा कार्यकर्ताहरूले आफ्नो तस्बिर राखेर आन्दोलन गरिरहेकोप्रति गम्भीर ध्यानाकर्षण भएको बताएका छन्। उनले यो विषयलाई लिएर प्रश्नसमेत उठाएका छन्।
गुरुङले रास्वपा कार्यकर्ताहरूलाई प्रश्न गर्दै भने, ‘यदि ज्योति गुरुङले गरेको गल्तीको दोषी मलाई बनाएर नाराबाजी गर्ने हो भने, रवि लामिछानेले गरेको गल्तीमा निकिता पौडेललाई हिरासतमा राखेर कारबाही किन नगरेको?’
गुरुङको भनाइले राजनीतिक वृत्तमा बहसलाई अझै तातेको छ, जहाँ उनले आफूलाई निर्दोष सावित गर्नका लागि निष्पक्ष छानबिनको माग गर्दै भ्रष्टाचार विरुद्ध आफ्नो अडान प्रकट गरेका छन्।
प्रतिक्रिया
