विश्व वातावरण दिवसमा गौरादहामा वृक्षरोपण कार्यक्रम सम्पन्नगौरादहा, झापा । विश्व वातावरण दिवस २०२५ को अवसरमा माउन्ट एभरेस्ट माध्यमिक विद्यालय, गौरादहको जुनियर रेडक्रस सर्कलले गोपेश्वर कृष्ण गंगा घाटमा वृक्षरोपण कार्यक्रम आयोजना गरेको छ। गौरादह-१ मा अवस्थित यो घाटमा आयोजित कार्यक्रममा विद्यार्थीहरूले विभिन्न प्रजातिका फूल र वनस्पति रोपेका छन्।कार्यक्रममा विद्यालयका शिक्षक परशुराम कार्कीले विद्यार्थीहरूले उत्साहपूर्वक फलफूल, फूल र अन्य वनस्पतिका बिरुवा रोपेको जानकारी दिए। उनले यो कार्यले विद्यार्थीमा वातावरणप्रति जिम्मेवारीबोध र सामाजिक भावना जागृत गर्न सहयोग पुग्ने बताए।कार्यक्रमलाई औपचारिक रूपमा सञ्चालन गरिएको थियो। यस अवसरमा नगर प्रवक्ता तथा वडा नम्बर १ का अध्यक्ष नगेन्द्र भण्डारीले माउन्ट एभरेस्ट मा.वि.ले राष्ट्रिय दिवसहरूमा सधैं प्रशंसनीय योगदान दिएको उल्लेख गरे। उनले भने, “हाम्रा विद्यार्थी भाइबहिनीहरूलाई सामाजिक कार्यमा संलग्न गराएर उनीहरूमा सामाजिक भावना र नेतृत्व विकास गर्नुपर्छ। यस्ता कार्यक्रमले त्यसमा ठूलो भूमिका खेल्छन्।”विद्यालयका प्राचार्य नारायण प्रसाद घिमिरेले विद्यार्थीहरू सामाजिक कार्यमा अब्बल रहेको बताउँदै विद्यालयले अतिरिक्त क्रियाकलापलाई सधैं प्राथमिकता दिएको उल्लेख गरे। उनले भने, “हामीले विभिन्न संघसंस्थाको सहकार्यमा धेरै वृक्षरोपण गरेका छौं, तर संरक्षणको अभावमा बिरुवाहरू हुर्किन पाउँदैनन्। यसतर्फ सबैको ध्यान जान जरुरी छ।”कार्यक्रममा गोपेश्वर घाट व्यवस्थापन समितिका अध्यक्ष टंक कार्कीले वृक्षरोपणका लागि यो स्थान छनोट गरेकोमा खुशी व्यक्त गरे। उनले भने, “गोपेश्वर घाटलाई हरियाली र रमणीय बनाउन सबैको सहयोग आवश्यक छ। यस्ता कार्यक्रमले हाम्रो समुदायलाई एकताबद्ध बनाउँछ।” 

कार्यक्रममा विद्यालयका शिक्षकहरू, जुनियर रेडक्रस सर्कलका विद्यार्थीहरू, नेपाल रेडक्रस सोसाइटी गौरादह शाखाका सचिव प्रकाश भट्टराई र स्थानीय समुदायको उल्लेखनीय सहभागिता थियो। कार्यक्रमको सञ्चालन माउन्ट जुरेस शिक्षक नायक डी.पी. भट्टराईले गरेका थिए।यो वृक्षरोपण कार्यक्रमले गौरादहा क्षेत्रमा वातावरण संरक्षण र सामुदायिक सहभागिताको सन्देश प्रवाह गरेको छ। स्थानीय समुदाय र विद्यालयको यो प्रयासले वातावरण जोगाउन र भावी पुस्तालाई जिम्मेवार बनाउन महत्वपूर्ण योगदान पुग्ने अपेक्षा गरिएको छ।