काठमाडौँ । राष्ट्रपति रामचन्द्र पौडेलले हमासले बन्धक बनाएर राखेका महेन्द्रनगरका विपिन जोशीको रिहाइका लागि जोर्डनका राजा अब्दुल्ला द्वितीयलाई आवश्यक पहल गर्न आग्रह गरेका छन् ।

राष्ट्रपति पौडेलले मंगलबार राजा अब्दुल्लालाई पत्र पठाउँदै जोशीको अवस्था पत्ता लगाउने, सुरक्षित रिहाइ सुनिश्चित गर्ने र स्वदेश फिर्तीका लागि मानवीय तथा कूटनीतिक पहल गर्न आग्रह गरेका हुन् । उनले पत्रमा यस प्रयोजनका लागि जोर्डनले चाल्ने सबै कदमलाई नेपाल र नेपाली जनताले उच्च प्रशंसा गर्ने उल्लेख गरेका छन् ।

यसअघि आइतबार जोशीकी आमा र बहिनीले राष्ट्रपति भवन शीतल निवासमा भेट गर्दै छोराको रिहाइका लागि पहल गरिदिन आग्रह गरेका थिए । सो अवसरमा राष्ट्रपति पौडेलले जोशीलाई मुक्त गराउन थप प्रयास गर्ने प्रतिबद्धता जनाएका थिए ।

यसैबीच, परराष्ट्र मन्त्रालयले मंगलबार विज्ञप्ति जारी गर्दै जोशीको अवस्था अझै यकिन नभएको जनाएको छ । मन्त्रालयका अनुसार हमासको कब्जाबाट मुक्त गराई स्वदेश फिर्ता ल्याउने विषयमा नेपाल सरकार निरन्तर प्रयासरत रहेको छ ।