काठमाण्डौ – प्रधानमन्त्री केपी शर्मा ओलीले बाढी र पहिरोले देशभरि पुर्याएको क्षतिपछि सरकारले उद्धार र राहतका कामलाई तीव्रता दिएको बताउनुभएको छ। अमेरिकाको भ्रमण सकेर आज नेपाल फर्किएका प्रधानमन्त्री ओलीले त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै विपद् व्यवस्थापनमा सरकारले आफ्नो क्षमताअनुसारको प्रभावकारी कदम चालिरहेको स्पष्ट पार्नुभयो।

प्रधानमन्त्री ओलीले मौसम विज्ञान विभागले एक हप्ता अघि नै भारी वर्षाको पूर्वसूचना दिएको भए पनि, पहिरो र डुबान कहाँ कहाँ हुन्छ भन्ने ठ्याक्कै अनुमान गर्न सरकार असमर्थ रहेको बताउनुभयो। उहाँका अनुसार, यस्तो विपद्को स्पष्ट भविष्यवाणी गर्न कठिन छ, तर सरकारले आपत्कालीन परिस्थितिमा राहत तथा उद्धारको कामलाई उच्च प्राथमिकतामा राखेर अघि बढाएको छ।

यसका साथै, प्रधानमन्त्रीले विरोधका लागि विरोध नगर्न आग्रह गर्दै उद्धार र राहत कार्यमा सबैले सघाउनुपर्ने कुरामा जोड दिनुभएको छ। उहाँले विपद् व्यवस्थापनमा भएको सरकारी तयारी र कदमप्रति विश्वास राख्न अपिल गर्दै जनताको सुरक्षामा सरकार कुनै कसर बाँकी नराख्ने बताउनुभयो।