झापा । Gen Z आन्दोलनका कारण उत्पन्न तनावपश्चात झापामा शान्ति–सुरक्षा कायम गर्न जिल्ला प्रशासन कार्यालयले कर्फ्यु आदेश जारी गरेको छ। प्रमुख जिल्ला अधिकारी गोपाल कुमार अधिकारीले आइतबार सूचना जारी गर्दै भदौ २८ गते बिहान ६ बजेदेखि कर्फ्यु लागू हुने जानकारी दिएका हुन्। कर्फ्युबीच सर्वसाधारणलाई अत्यावश्यक दैनिक उपभोग्य सामान खरिदका लागि बिहान ६ देखि ९ बजेसम्म मात्र घरबाहिर निस्कन छुट दिइने छ। सो समय बाहेक घरबाहिर निस्कन, भिडभाड वा जमघट गर्न निषेध गरिएको प्रशासनले स्पष्ट पारेको छ। यस्तै, आजै दिउँसो २ बजेदेखि साँझ ५ बजेसम्म र साँझ ५ बजेदेखि राति ९ बजेसम्म पनि कर्फ्यु खुकुलो गरिने बताइएको छ। तर, राति ९ बजेदेखि भदौ २९ गते बिहान ६ बजेसम्म पुनः “हार्ड कर्फ्यु” लागू हुने प्रजिअ अधिकारीले बताएका छन्। कर्फ्यु अवधिमा एम्बुलेन्स, शववाहन, दमकल, स्वास्थ्यकर्मी, सुरक्षाकर्मी, दूध, पानी, तरकारी बोकेको तथा विद्युत/सञ्चार सेवासँग सम्बन्धित सवारीसाधनलाई भने विशेष अनुमति प्राप्त गरी सञ्चालन गर्न सकिनेछ। जिल्ला प्रशासनले अत्यावश्यक सेवामा खटिनु परे सम्बन्धित सुरक्षा निकायसँग सम्पर्क राखी अनुमति लिन समेत आग्रह गरेको छ।