पर्दाफास/ बैशाख २७ गौरादह, झापा –
लायन्स क्लब अफ गौरादहद्वारा शनिबार आयोजित पाँच किलोमिटरको म्याराथन दौडले केवल प्रतिस्पर्धा मात्र होइन, समाजमा फैलिएको एक गम्भीर रोग – लागूपदार्थ दुर्व्यसन – विरुद्ध सचेतनाको हुंकार पनि बोकेको छ।

गौरादह नगरपालिकाको आर्थिक सहयोगमा सम्पन्न म्याराथनमा गौरादह–२ का सुपन कार्कीले १७ औं मिनेटमै दौड पूरा गर्दै प्रथम स्थान हात पार्दा, सयौं सहभागीहरूले आफ्नो शरीरको तागत मात्र होइन, लागूपदार्थ विरुद्धको एकजुटता पनि प्रदर्शन गरे। गौरादह–९ का मनिष घिमिरे दोस्रो र गौरादह–३ का सन्तोष दाहाल तेस्रो स्थानमा रहे। महिला तर्फ गौरादह–१ की सोफिया खातुन (२४ मिनेट) प्रथम भइन्।

तर सबैभन्दा प्रेरणादायक क्षण थियो, ८० वर्षीय केदार बिमलीको दौड। ३९ मिनेटमा पाँच किलोमिटर पूरा गर्दै उनले समाजमा एउटा गहिरो सन्देश छाडे- 'उमेरले होइन, संकल्पले लड्न सकिन्छ दुर्व्यसन विरुद्ध।'

कार्यक्रमका संयोजक एवं पूर्व वडाध्यक्ष हेमन्त कार्कीले स्वयंसेवक प्रहरी गठन गर्ने घोषणा गर्दै लागूपदार्थको अवैध ओसारपसारविरुद्ध कडा निगरानी गर्ने योजना सार्वजनिक गरे।
नगरप्रमुख छत्रपति सुवेदीले औपचारिक समारोहमा भने, 'कार्यक्रमले चेतना फैलाउँछ, तर नियन्त्रणको मूल चाबी भनेको आपूर्ति रोक्नु हो।'

एकीकृत प्रयासको खाँचो

कार्यक्रमले तत्काल उत्साह सिर्जना गरे पनि समस्याको जरा उखेल्न स्थानीय सरकार, सुरक्षासंस्थाहरू, र सामाजिक संघसंस्थाहरूको समन्वयमा दीर्घकालीन कार्यक्रम अपरिहार्य देखिन्छ।

अब समय आइसकेको छ, ‘एकदिने उत्सव हैन, निरन्तर अभियान’ भन्ने दृष्टिकोणसहित लागूपदार्थविरुद्धको संघर्षलाई संस्थागत र सशक्त बनाउने।

गौरादहको म्याराथनले एउटा ठुलो सन्देश दिएको छ - समस्या ठूलो छ, तर समाज अझ ठूलो छ। चेतनाले जब दौडन सिक्छ, दुर्व्यसन जस्तो अन्धकार हटाउन धेरै समय लाग्दैन।

भिडियो हेर्न तलको लिंक क्लिक गर्नुहोस

८० वर्ष को उमेरमा ५ किलोमीटर दौड