काठमाडौँ । पश्चिम एसियामा जारी तनाव थप चुलिँदै गएको छ। अमेरिकी नौसैनिक बलले होर्मुज जलडमरूमध्य नजिकै इरानको झण्डा बोकेको एक जहाज नियन्त्रणमा लिएको खबर सार्वजनिक भएपछि इरानले अमेरिकाविरुद्ध आवश्यक कदम चाल्ने चेतावनी दिएको छ।

इरानको सरकारी सञ्चारमाध्यमका अनुसार इरानले यस घटनालाई ‘खुला आक्रमण’ का रूपमा लिएको छ। इस्लामिक रिभोलुसनरी गार्ड कोर (आईआरजीसी) सँग सम्बन्धित तस्निम न्यूज एजेन्सीले इरानी सेना ‘निर्णायक जवाफ’ दिन तयार रहेको जनाएको छ।

चालक दल र परिवारको सुरक्षा पहिलो प्राथमिकता
तस्निमका अनुसार जहाजमा चालक दलका सदस्यसँगै उनीहरूका परिवार पनि रहेका कारण तत्काल प्रतिकार गर्न केही सीमितता छ। समाचारमा भनिएको छ, “हालको परिस्थितिमा जहाजमा रहेका परिवार र चालक दलको सुरक्षा सुनिश्चित भएपछि इस्लामिक गणतन्त्र इरानका शक्तिशाली सशस्त्र बलले अमेरिकी सेनाविरुद्ध आवश्यक कदम चाल्नेछन्।” यसले इरानले चालक दल र उनीहरूका परिवारको सुरक्षालाई प्राथमिकतामा राखेको सङ्केत गर्छ।

वार्ता प्रभावित
यो घटनाले पहिले नै संवेदनशील अवस्थामा रहेको क्षेत्रमा तनाव थप बढाएको छ। आइतबार अमेरिकी नौसैनिक बलले नियन्त्रणमा लिएको उक्त इरानी कार्गो जहाजले अमेरिकी नाकाबन्दी तोड्दै जलडमरूमध्य पार गर्ने प्रयास गरिरहेको बताइएको छ।

यस घटनापछि इरान यसै साता तय भएको युद्धविरामसम्बन्धी दोस्रो चरणको वार्ताबाट पछि हटेको छ। Image: Routers