एकीकृत समाजवादीले महाधिवेशनको डेढ महिनापछि निर्वाचनबाट पदाधिकारी चयन गरेको छ । उपाध्यक्ष, उपमहासचिव र सचिव गरी १७ पदाधिकारीका लागि ६६ जना चुनावी प्रतिस्पर्धामा थिए । उपाध्यक्ष खुलामा डा. गंगालाल तुलाधर, जगन्नाथ खतिवडा, भानुभक्त जोशी र प्रकाश ज्वाला विजयी भएका छन् । 

तुलाधरले १८९, खतिवडाले १६१, जोशीले १५६ र ज्वालाले १३९ मत ल्याएका छन् । पराजित विरोध खतिवडाले १२७ र डा. विजय पौडेलले १०७ मत ल्याएका छन् भने अन्यले सयभन्दा कम मत ल्याएका छन् । उपाध्यक्ष खुला चारजनाका लागि ११ जना प्रतिस्पर्धामा थिए । ललितबहादुर बस्नेत, उर्वादत्त पन्त, साध्यबहादुर भण्डारी, केशवलाल श्रेष्ठ र बलराम बास्कोटा पनि उम्मेदवार थिए ।

महिला उपाध्यक्षमा जयन्ती राईले रामकुमारी झाँक्रीलाई पराजित गरेकी छिन् । राईले सर्वाधिक १९९ मत ल्याउँदा झाँक्रीले ११२ मत मात्र ल्याइन् । झाँक्री चर्चित पात्र भए पनि नेतृत्वसँग राम्रो सम्बन्ध नभएकाले धेरै मतान्तरले पराजित भएको नेताहरू बताउँछन् । ‘उहाँको सम्बन्ध अध्यक्षसँग र सम्मानित नेतासँग पनि राम्रो थिएन । नेतृत्वविरुद्ध विगतमा उहाँले विषवमन गर्नुभएको थियो । त्यसैको परिणाम निर्वाचनमा देखियो,’ नेपालनिकट एक नेताले भने । झाँक्रीनिकट नेताहरूले बदलाको राजनीति राम्रो नहुने चेतावनी दिएका छन् । एक केन्द्रीय सदस्यका अनुसार भोट नहाल्ने सूची पनि वितरण गरिएको थियो । जसमा डा. विजय पौडेल, प्रकाश ज्वाला र रामकुमार झाँक्रीको नाम थियो । उनीहरूले पार्टीमा पुस्तान्तरणको विषय उठान गरेका थिए । 

मधेशी उपाध्यक्षमा धर्मनाथप्रसाद साहले रामचन्द्र झालाई पराजित गरेका छन् । उपमहासचिवमा मेटमणि चौधरी, गरिमा शाह, रामकुमार भट्टराई र राजेन्द्र राई विजयी भएका छन् । उपमहासचिव चारजनाका लागि १९ जना चुनावी मैदानमा थिए । लक्ष्मण केसी, रामचन्द्र यादव, महेश रेग्मी, डा. देउमान सम्बाहाङ्फे, नागेन्द्र चौधरी, अम्बरबहादुर थापा, लक्ष्मण पौडेल, शत्रुधन महतो, हरिप्रसाद पराजुली, श्रीप्रसाद साह, जीवनराम श्रेष्ठ, मीना ज्ञवाली, भविश्वर पराजुली, गोमा विष्ट र भवानी खड्का पनि प्रतिस्पर्धामा थिए । सचिव दलितमा गणेश विश्वकर्मा र सचिव आदिवासी जनजातिमा बलदेव चौधरी निर्वाचित भएका छन् । सचिव खुलामा शेरबहादुर कुँवर, सोमप्रसाद पाण्डेय, सावित्रा भुसाल, श्रीनाथ बराल र चन्द्रबहादुर शाही विजयी भएका छन् ।