काठमाडौं । पोर्चुगलका महान् फुटबलर क्रिस्टियानो रोनाल्डोले आफ्नो खेलाडी जीवन अन्त्यको संघारमा पुगेको संकेत गरेका छन्। ४१ वर्षीय रोनाल्डोले सम्भवतः यो आफ्नो व्यावसायिक फुटबल करियरको अन्तिम वर्ष हुन सक्ने बताएका हुन्।

आफ्नो विवाहका अवसरमा भोग म्यागजिनसँग कुरा गर्दै रोनाल्डोले मैदानबाट उत्कृष्ट विरासत छाडेर बिदा हुन चाहेको बताएका छन्। लामो समयदेखि विश्व फुटबलमा प्रभाव जमाउँदै आएका उनले अब खेल जीवनपछिको समय कसरी बिताउने भन्ने योजनासमेत बनाइसकेको बताए।

‘सायद यो मेरो फुटबल करियरको अन्तिम वर्ष हो र म शानदार विरासत छाड्न चाहन्छु,’ रोनाल्डोले भनेका छन्।

फुटबलबाट टाढिएपछि परिवारसँग बढी समय बिताउने, विभिन्न स्थानमा यात्रा गर्ने तथा आफूलाई मन पर्ने प्याडेल खेल्ने उनको योजना छ। दशकौँ लामो खेल जीवनमा निरन्तर व्यस्त रहँदै आएका रोनाल्डोले फुटबल छाडेपछि आउने खालीपनलाई विभिन्न गतिविधिमार्फत पूरा गर्ने बताएका छन्।

रोनाल्डोले आफ्नो फुटबल करियरका करिब २५ वर्ष त्याग, मेहनत र संघर्षमा बितेको बताएका छन्। विश्वका विभिन्न क्लब हुँदै अहिले साउदी अरबमा व्यावसायिक फुटबल खेलिरहेका उनी अझै मैदानमा सक्रिय छन्।

तर ‘सम्भवतः अन्तिम वर्ष’ भन्ने उनको अभिव्यक्तिले विश्व फुटबलका सर्वाधिक सफल खेलाडीमध्ये एक रोनाल्डोको खेलाडी जीवन अब अन्तिम चरणमा पुगेको संकेत गरेको छ।

रोनाल्डोले लामो समयकी पार्टनर जर्जिना रोड्रिग्वेजसँग अगस्ट ११ मा विवाह गरेका छन्। करिब १० वर्षको सम्बन्धपछि उनीहरूले पारिवारिक वातावरणमा निजी रूपमा विवाह गरेका हुन्।

विवाहपछि उनीहरू पोर्चुगलको फातिमा पनि पुगेका थिए। भीडभाडभन्दा निजी जीवन रुचाउने भएकाले विवाह समारोहलाई पनि सीमित राखिएको रोनाल्डोले बताएका छन्।

अब फुटबलपछि परिवारसँग बढी समय बिताउने उनको चाहना देखिन्छ। यात्रा, प्याडेल र पारिवारिक जीवनलाई उनले आफ्नो आगामी योजनाका रूपमा अघि सारेका छन्।

रोनाल्डोले खेलाडी जीवनपछि फुटबलसँगको सम्बन्ध पूर्ण रूपमा अन्त्य गर्ने संकेत भने दिएका छैनन्। तर खेलाडीका रूपमा मैदानमा बिताएका २५ वर्षपछि उनी जीवनको अर्को अध्यायतर्फ अघि बढ्ने तयारीमा रहेको स्पष्ट हुन्छ।

उनको संन्यासको औपचारिक मिति भने तय भइसकेको छैन। त्यसैले ‘सायद यो अन्तिम वर्ष हो’ भन्ने उनको भनाइले विश्व फुटबलमा अहिले नै ठूलो चर्चा जन्माएको छ।

रोनाल्डोले मैदान छाड्ने समय नजिकिँदै गर्दा अब विश्व फुटबलप्रेमीको एउटै प्रश्न छ—महान् गोल मेसिन रोनाल्डोले अन्तिमपटक कहिले फुटबल बुट थन्क्याउलान्?