काठमाडौं । रसुवाको भोटेकोशी क्षेत्रमा आएको विनाशकारी बाढीका कारण शुक्रबार बिहान ५ बजेसम्म १ हजार २ सय ८० जनाको शव फेला परेको नेपाल प्रहरीले जनाएको छ।

प्रहरीका अनुसार फेला परेका शवमध्ये रसुवामा १ सय ४०, नुवाकोटमा १ सय ८५, धादिङमा ६०, चितवनमा ३ सय ५९, गोरखामा ७२, तनहुँमा ३८, नवलपरासी पूर्वमा २ सय १८ र नवलपरासी पश्चिममा १ सय ९० जनाको शव फेला परेको छ। भारतमा फेला परेको र नवलपरासी पश्चिममा बुझाइएको १८ वटा शवसमेत गरी मृतकको संख्या १ हजार २ सय ८० पुगेको हो।

बाढीमा घाइते भएकामध्ये उपचारका क्रममा थप दुई जनाको मृत्यु भएको प्रहरीले जनाएको छ। उनीहरूमध्ये एक जनाको शिक्षण अस्पताल र अर्का एक जनाको राष्ट्रिय ट्रमा सेन्टरमा उपचारका क्रममा मृत्यु भएको हो।

९२६ शव व्यवस्थापन

फेला परेका शवको पहिचानका लागि डीएनए नमुना संकलनलगायत आवश्यक प्रक्रिया अघि बढाइएको छ। हालसम्म २ सय ८ महिला, ३ सय ३५ पुरुष र ३ सय ८३ जनाको लिंग नखुलेको गरी ९ सय २६ शव व्यवस्थापन गरिएको प्रहरीले जनाएको छ।

शवहरूको पहिचान तथा अभिलेख व्यवस्थापनका लागि आवश्यक प्रक्रिया जारी रहेको छ। पहिचान नभएका १ हजार १ सय ४१ शवको विवरण नेपाल प्रहरीको वेबसाइटमा समेत अपलोड गरिएको प्रहरीले जनाएको छ।

खोजी तथा उद्धारमा ७ हजार ९३२ प्रहरी परिचालन

बाढी प्रभावित क्षेत्रमा उद्धार, खोजी, राहत वितरण तथा शव व्यवस्थापनका लागि नेपाल प्रहरीले ठूलो संख्यामा जनशक्ति परिचालन गरेको छ।

प्रहरीका अनुसार हालसम्म ७ हजार ९ सय ३२ जना प्रहरी कर्मचारी प्रभावित क्षेत्रमा परिचालन भएका छन्। बाढीपछि बेपत्ता भएका ४ हजार ७ सय ९८ जनाको खोजी कार्य अझै जारी रहेको छ।

त्यस्तै, विभिन्न जिल्लामा स्थापना गरिएका होल्डिङ सेन्टरमा ३ हजार ६ सय ३१ जनालाई राखिएको प्रहरीले जनाएको छ।

सुरक्षित स्थानमा सार्ने काम जारी

बाढीको जोखिममा रहेका विभिन्न जिल्लाका घरपरिवारलाई सुरक्षित स्थानमा सार्ने कामसमेत भइरहेको प्रहरीले जनाएको छ।

विभिन्न सरकारी निकाय, स्थानीय तह, सुरक्षा निकाय र स्थानीयवासीको समन्वय तथा सहयोगमा खोज तथा उद्धार कार्यलाई निरन्तरता दिइएको छ। बाढी तथा पहिरोका कारण अवरुद्ध भएका विभिन्न सडक तथा बाटो खुलाउने काम पनि भइरहेको प्रहरीले जनाएको छ।

प्राकृतिक विपत्तिपछि प्रभावित क्षेत्रमा उद्धार, खोजी, राहत तथा शव व्यवस्थापनको काम एकसाथ अघि बढाउनुपर्ने अवस्था रहेको छ। ठूलो संख्यामा मानिस अझै बेपत्ता रहेकाले खोजी अभियानलाई तीव्रता दिइएको प्रहरीले जनाएको छ।

बाढीपछि हराएका परिवारजनको खोजीमा आफन्तको प्रतीक्षा जारी छ भने सुरक्षाकर्मी र उद्धार टोली बेपत्ताको खोजीमा निरन्तर खटिरहेका छन्।