गौरादह, २८ भदौ २०८३। गौरादहमा महिला फुटबलको उत्सव बनेको मैदानमा आइतबार आयोजक स्पर्श सामाजिक क्लबले फेरि आफ्नो दबदबा कायम गरेको छ। घरेलु दर्शकको उत्साहबीच भएको फाइनलमा स्पर्श क्लबले भारतको रोथखोला एफसी, वेस्ट बंगाललाई ३–० गोल अन्तरले पराजित गर्दै उपाधि रक्षा गरेको हो।

गौरादहमा पहिलोपटक आयोजना गरिएको महिला फुटबल प्रतियोगिताले स्थानीय खेल क्षेत्रमा नयाँ माहोल सिर्जना गरेको थियो। प्रतियोगितामा नेपालका सात र भारतको एक टोली गरी आठ महिला टोली सहभागी भएका थिए।

फाइनलमा स्पर्शले सुरुदेखि नै आक्रामक खेल प्रस्तुत गर्‍यो। पहिलो हाफको ३६औँ मिनेटमा सुजता पालुङवाले गोल गर्दै घरेलु टोलीलाई १–० को अग्रता दिलाइन्। पहिलो हाफको अन्त्यतिर प्राप्त अग्रताले दोस्रो हाफमा स्पर्शलाई थप आत्मविश्वास दिएको थियो।

दोस्रो हाफमा पनि आयोजकले दबाब कायम राख्यो। खेलको ४३औँ मिनेटमा मनिका तुम्रकले गोल गर्दै स्पर्शको अग्रता २–० पुर्‍याइन्। त्यसपछि ५२औँ मिनेटमा समीक्षा मगरले तेस्रो गोल थपेपछि खेल स्पर्शको नियन्त्रणमा पुग्यो।

वेस्ट बंगालले मिडफिल्डमा केही आकर्षक संयोजन गर्दै खेलमा फर्किने प्रयास गरेको थियो। तर अन्तिम प्रहारमा प्रभावकारी फिनिसिङ गर्न नसक्दा गोलको खाता खोल्न सकेन। घरेलु टोलीले भने रक्षापंक्तिमा विपक्षीलाई धेरै अवसर नदिँदै आक्रमणलाई निरन्तरता दिएको थियो।

स्पर्शका खेलाडीले थप गोल गर्ने केही अवसर सिर्जना गरे पनि ती अवसर गोलमा परिणत हुन सकेनन्। अन्ततः खेल ३–० मै सकियो र स्पर्शले उपाधि आफ्नो नाममा सुरक्षित गर्‍यो।

फाइनल खेलमा मनिता तामाङ ‘म्यान अफ द म्याच’ घोषित भइन्। त्यस्तै पहिलो गोल गर्ने खेलाडीलाई मेडिको केयरले घोषणा गरेको रु. १० हजार पुरस्कार स्पर्शकी सुजता पालुङवाले प्राप्त गरिन्। प्रतियोगिताभर ऊर्जाशील प्रदर्शन गर्ने खेलाडीका रूपमा काकडभिट्टा महिला फुटबलकी १२ वर्षीया सरस्वती राजवंशी घोषित भइन्।

उपाधिसँगै आयोजक स्पर्श क्लबले रु. १ लाख ११ हजार १ सय ११ नगदसहित ट्रफी, मेडल र प्रमाणपत्र प्राप्त गर्‍यो। उपविजेता रोथखोला एफसी वेस्ट बंगालले रु. ५५ हजार ५ सय ५५ नगदसहित ट्रफी, मेडल र प्रमाणपत्र प्राप्त गरेको छ। प्रतियोगिताको सुरुवातमै आयोजकले यही पुरस्कार राशि घोषणा गरेको थियो।

फाइनल खेलका प्रमुख अतिथि कोशी प्रदेशका मुख्यमन्त्री हिक्मतकुमार कार्कीले मुख्य रेफ्रीलाई बल हस्तान्तरण गर्दै खेलको उद्घाटन गरेका थिए। उनले खेलकुद अनुशासनसँग जोडिएको क्षेत्र भएकाले युवामा अनुशासन विकास गर्न खेलकुदको महत्वपूर्ण भूमिका रहने बताए। गौरादहमा महिला फुटबल प्रतियोगिताको सुरुवातले यस क्षेत्रका महिलामा फुटबलप्रतिको आकर्षण अझ बढ्ने विश्वाससमेत उनले व्यक्त गरे।

जिल्ला प्रहरी कार्यालय झापाकी प्रहरी प्रमुख एसपी वसुधरा खड्काले युवामा खेलकुदको विकाससँगै लागूऔषध दुर्व्यसन नियन्त्रणमा समेत सकारात्मक प्रभाव पर्ने बताइन्।

स्पर्श सामाजिक क्लबका अध्यक्ष उज्ज्वल दाहालको अध्यक्षतामा प्रतियोगिताको फाइनल सम्पन्न भएको हो।

गौरादहको मैदानमा सम्पन्न यो प्रतियोगिता एउटा ट्रफीका लागि भएको प्रतिस्पर्धामात्र बनेन। महिला खेलाडीलाई मैदानमा ल्याउने, उनीहरूको प्रतिभालाई स्थानीय स्तरमै पहिचान दिने र खेलकुदमार्फत युवालाई सकारात्मक गतिविधिमा जोड्ने प्रयासका रूपमा प्रतियोगिताले चर्चा पाएको छ।

प्रतियोगिता सुरु गर्दा आयोजकले महिला फुटबलको विकास, खेलाडीलाई प्रोत्साहन र स्थानीय स्तरमा महिला फुटबलको वातावरण निर्माणलाई मुख्य उद्देश्य बनाएको थियो।

फाइनलमा स्पर्श क्लबको ३–० को जितले उपाधि रक्षा त गर्‍यो नै, गौरादहमा महिला फुटबलका लागि बनिरहेको नयाँ वातावरणलाई पनि थप ऊर्जा दिएको छ। घरेलु मैदानमा उपाधि उचालेको स्पर्शका लागि यो जित एउटा प्रतियोगिताको सफलता मात्र नभई गौरादहमा महिला फुटबलको सम्भावना देखाउने एउटा बलियो सन्देशसमेत बनेको छ।

Image: Shankar Kattel