काठमाडौं – नेपाल प्रिमियर लिग (एनपीएल) को दोस्रो संस्करण आगामी नोभेम्बर १७ देखि सुरु हुने भएको छ। आयोजकले बिहीबार सामाजिक सञ्जालमार्फत प्रतियोगिताको मिति सार्वजनिक गरेको हो।

एनपीएल २०२५ नोभेम्बर १७ देखि डिसेम्बर १३ सम्म सञ्चालन हुनेछ। आयोजकका अनुसार आवश्यक तयारीहरू तीव्र गतिमा अगाडि बढाइएका छन्।

यसअघि खेलाडी छनोटका लागि मिनी अक्सन सम्पन्न भइसकेको छ। सहभागी टोलीहरूले अक्सनमार्फत आवश्यक खेलाडी अनुबन्ध गरिसकेका छन्।

पहिलो संस्करणपछि दोस्रो संस्करणप्रति खेलप्रेमीको चासो उल्लेख्य रूपमा बढेको देखिएको छ। आयोजकले यस संस्करणलाई थप व्यवस्थित र प्रतिस्पर्धात्मक बनाउन विशेष योजना बनाइएको दाबी गरेको छ।

एनपीएल नेपालकै प्रमुख फ्रेन्चाइज क्रिकेट लिग मानिन्छ। यसले युवा खेलाडीहरूलाई अन्तर्राष्ट्रिय स्तरमा आफ्नो प्रतिभा देखाउने अवसर प्रदान गर्ने विश्वास गरिएको छ।